Tæknisýningin- og ráðstefnan UTmessan er haldin um helgina í tónlistar- og ráðstefnuhúsinu Hörpu. Fyrri dagurinn er fyrir ráðstefnugesti sem borga sig inn. Á laugardaginn 6. febrúar er opið hús og ókeypis fyrir alla fjölskylduna frá klukkan 10:00-17:00.

Á UTmessunni á laugardag verður hægt að sjá ýmislegt splunkunýtt í tölvu- og tæknigeiranum, hlusta á örstutta fyrirlestra um hin ýmsu mál og taka þátt í getraunum og leikjum.

Sýningin er ætluð almenningi, konum og körlum, stelpum og strákum, ungum sem öldnum.

UTmessan er málið á laugardag.

Á meðal þess sem er í boði:

• Fylgjast með hönnunarkeppni véla- og iðnverkfræðinema
• Kynnast því hvernig smíði á kappakstursbíl fer fram
• Skema er með Minecraft vinnusmiðju þar sem hús Advania verður byggt í leiknum. Líka verður hægt að spila Minecraft með aðstoð Makey Makey örtölvu
• Kynning á forritunarumhverfum sem notuð eru á námskeiðum Skema eins og Alice, Kodu Game Lab, Unity 3D og GameSalad
• Tæta í sundur tölvur og setja saman með sys/trum, félagi kvenna í tölvunarfræðideild HR og Promennt
• Foreldrum gefnar hugmyndir að tæknifikti sem þau geta gert með börnum sínum
• 5 góð ráð fyrir öruggari notkun á tölvupósti og interneti

Hafið þið áhuga? Hér er öll dagskráin á UTmessunni.