Sirkus Íslands hefur verið á ferðalagi um landi í sumar. Nú er sirkusinn búinn að reisa sirkustjaldið Jöklu á Klambratúni í Reykjavík. Þar er Sirkus Íslands með tvær sýningar fyrir alla fjölskylduna. Úllendúllen hefur fært sýningarnar inn í viðburðadagatalið og því lítið mál að sjá hvenær sirkusinn setur upp sýningu.

Fjörið er mikið og má bóka að krakkarnir hlægi mikið!

Ef þið hafið ekki farið á sýningu Sirkuss Íslands þá verðið þið að drífa ykkur. Síðustu sýningar verða 23. ágúst en þá verður tjaldinu pakkað niður og fer sirkusinn í vetrarham.

Heima er best

Heima er best er fjölskylduskemmtun í heila tvo tíma. Yngra fólkið getur auðvitað ekki setið kyrrt í svo langan tíma og þess vegna er hlé í kortér á sýningunni. Sirkusinn lofar miklu húllumhæi fyrir alla.

Aðgangsmiði á sýninguna kostar 3.500 krónur. Börn undir þriggja ára aldri fá ókeypis inn ef þau sitja í fangi foreldra/forráðamanna. Börn yngri en 10 ára verða að vera í fylgd einstaklings sem er 15 ára eða eldri.

Krakkasýningin S.I.R.K.U.S.

Sýningin S.I.R.K.U.S. er fyrir yngstu áhorfendurna og töluvert styttri, bara klukkutími. Sirkusfólkið segir hana miðaða fyrir þriggja til tíu ára. Verðinu er stillt í hóf en miðinn kostar 3.000 krónur. Börn undir þriggja ára aldri fá ókeypis inn ef þau sitja í fangi foreldra/forráðamanna. Börn yngri en 10 ára verða að vera í fylgd einstaklings sem verður að vera 15 ára eða eldri.

Þú getur fundið nánari upplýsingar um sýningar Sirkuss Íslands og tímasetningar á midi.is