Viljiði fara í ferðalag en eyða sem minnstu á áfangastað? Þá er nú tilvalið að skella sér á byggðarhátíðina Reykhóladaga sem standa frá fimmtudegi og alveg fram á sunnudag. Margt er í boði fyrir káta krakka og fullorðna. Sumir viðburðirnir kosta reyndar smávegis.

Pabbi í súmóbleyju!

Hellingur er í boði. Á meðal þess er Bíó í báta og hlunninda, teymt undir börnunum, jógakennsla, súpa sem íbúðar að Reykhólum bjóða upp á, spurningakeppnin, brenna í Bjarkalundi, dráttavélasýning og dráttavélakeppni og kassabílarallí. Þá verður Karnivalsstemning með hoppuköstulum, andlitsmálningu fyrir börn á öllum aldri, súmóglímubúningar sem gaman verður að sjá pabba troða sér í, zumba fitness, þaraþrautir og margt fleira.

Á laugardaginn verður haldið Reykhóladagahlaup. Fjórar vegalengdir eru í boði og örugglega leyfilegt að senda pabbana styttri vegalengdir í súmóglímubúningnum.

Ball með Spöðunum og Sóldögg

Rúsínurnar í pylsuendunum eru svo tvær gamalkunnar og vinsælar hljómsveitir sem koma fram. Það eru Spaðarnir góðkunnu (Guðmundur Andri Thorsson rithöfundur og tónlistarmaður og kompaní) og  Sóldögg með Begga í farabroddi.

Þið getið skoðað nánari upplýsingar um Reykhóladagana hér og séð hvað kostar á viðburðina sem eru í boði. Reykhóladagar eru líka með fína Facebook-síðu.

Það kostar ekkert að kíkja við á Reykhólum en miði á böll og viðburði kosta frá 500 -2.900 kr.