Það er sannkallað krakkastuð í Grófinni á sunnudögum fram í maí. Sunnudaginn 19. apríl klukkan 15:00 verður haldin smiðja og krökkum kennt að búa til svokallaða Origami-flugdreka.

Origami er japönsk pappírslist sem hefur notið mikilla vinsælda á Vesturlöndum. Origami gengur út á miserfið pappírsbrot sem eru svo endurtekin á ýmsan hátt eftir því hversu viðamikið verkefnið er. Ekkert þarf til nema pappír og skæri. Sumir segja mikilvægt að láta hæfilegan skammt af þolinmæði fylgja með. Aðrir segja heila rútu af þolinmæði þurfa á svæðið. En misjafnt er mannanna þolgæði.

Mætið og lærið að búa til fígúru úr pappír.