Þeir fjörugu krakkar og foreldrar þeirra geta heldur betur slakað á fyrir Tónaflóðið og flugeldasýninguna á Menningarnótt og skellt sér í krakkajóga fyrr um daginn. Ingunn Guðbrandsdóttir býður upp á fjóra 30 mínútna jógatíma fyrir börn á aldrinum 5 til 12 ára.  Í hverjum tíma verða kenndar skemmtilegar og fjölbreyttar jógastöður í bland við einfaldar öndunar- og slökunaræfingar.

Fram kemur á vef Borgarbókasafns að Ingunn leiðir börn á öllum aldri og bæði stráka og stelpur í gegnum jógastöður eins og tréð, ljónið, fiðrildið, froskinn og slönguna, með sögum og virkjar þau með hljóðum og leik. Ekki verður gert ráð fyrir að börnin hafi áður lært jóga og gott ef þau geta verið í þægilegum fötum til að auðvelda hreyfingu.

Nánari upplýsingar um krakkajóga Ingunnar má finna á vefsíðunni Ingunn.is og á Facebook-síðu hennar.

Tímarnir hefjast kl. 16.00, 16.30, 17.00 og 17.30.