Japanskar teiknimyndasögur, bardagalist, matur, menning og tónlist er meðal þess sem í boði verður á hinni árlegu Japanshátíð sem haldin verður á Háskólatorgi Háskóla Íslands laugardaginn 30. janúar kl. 13-17. Þetta er í tólfta sinn sem hátíðin er haldin.

Ókeypis er á hátíðina í Háskóla Íslands og allir velkomnir.

Á Japanshátíðinni er boðið upp á kennslu í origami og að teikna manga fígúrur, horfa á atriði eða drekka japanskt te. Gestum býðst m.a. að smakka japanskan mat, fá nafn sitt ritað á japönsku, kynnast japanskri tungu á sérstökum tungumálabás ásamt því að skoða glæsilega Ikebana-blómaskreytingu.

Dægurtónlist í Háskóla Íslands

Á hátíðinni verður líka kynning á japanskri dægurtónlist (J-pop) og munu nemendur háskólans í japönsku syngja og spila lög úr þekktum Anime-teiknimyndum ásamt hefðbundinni japanskri tónlist. Hefðbundinn japansku klæðnaður verður sýndur og kynntur á sérstakri tískusýningi og jafnframt stíga sérfræðingar í japanskri bardagalist á stokk og sýna listir sínar.

Fram kemur á vef Háskóla Íslands um hátíðina að einn af hápunktum Japanshátíðarinnar síðustu ár sé svokölluð Cosplay-búningakeppni en þar klæðast keppendur búningum byggðum á frægum persónum úr japönskum teiknimyndum.