Heimsdagur barna er í dag. Borgarbókasafn býður af því tilefni upp á margskonar skemmtun í anda víkinga.

Heimsdagur barna, sem er orðinn fastur liður í menningarlífi borgarinnar og hefur verið haldinn í Gerðubergi frá 2005. Í fyrra var sú breyting að smiðjur voru einnig í Borgarbókasafninu Sólheimum, Kringlunni og Spönginni. Í ár er dagurinn haldinn þegar grunnskólanemendur í Reykjavík eru í Vetrarfríi og ættu allir aldurshópar að finna eitthvað spennandi við sitt hæfi.

Dagskráin í Kringlunni

Sverðasmiðja

Enginn fer í víking óvopnaður. Í Kringlusafni verður hægt að útbúa sér sitt eigið sverð og hjálm áður en til orrustu er haldið!

Á vit víkinga

Hví ekki að skella sér í hlutverk víkinga til forna og lifa sig inn í ævintýri þess tíma. Ljósmyndari verður á staðnum í Kringlusafni og tekur hann myndir af litlum víkingum.

Sleipnir fer á flug!

Óðinn reið um himingeima á hinum áttfætta hesti Sleipni. Borgarbókasafnið segir ekki víst hvort Óðinn komi í heimsókn á bókasafnið. En hesturinn hans Sleipnir mun ekki láta sig vanta í fjörið í Kringlunni og taka börn með sér á hugarflug. Smiðjan er allan daginn en Sleipnir sjálfur verður á svæðinu klukkan 15:00.