Ferðafélag barnanna hefur vaxið og dafnað í gegnum tíðina og hafa margar fjölskyldur kynnst landinu upp á nýtt í ferðum á vegum þess. Á morgun er á döfinni fjölskylduferð að Valgeirsstöðum í Norðurfirði og ferð um Strandir.

Ferðin nú hljómar svona: Ferð norður í Árneshrepp á Ströndum með Ferðafélagi barnanna er gjarnan ávísun á hamingjustundir hjá fjölskyldum. Fararstjórar eru hjónin Auður Kjartansdóttir og Páll Guðmundsson. Bæði eru þau þaulreyndir fararstjórar og þekkja umhverfi og mannlíf á Ströndum vel.

Farið verður í fjallgöngu, fjöruferðir og í sund. Það þykir vera mögnuð upplifun fyrir börnin að fara í Krossneslaugina sem stendur við fjöru. Þar situr fólk og horfir á selina svamla í fjöruborðinu.

Gengið er 15 kílómetra yfir í Ingólfsfjörð til að skoða gömlu síldarverksmiðjuna. Á göngunni eru duglegustu börnin gerð ábyrg fyrir þeim sem hægar fara yfir. Þannig næst að halda hópnum vel saman.

Fastur liður í þessari árlegu ferð er varðeldur í fjörunni. Farsímar og tölvur eru ekki leyfð í ferðina. Börn og foreldrar ná þannig að kynnast með nýjum hætti á slóðum sem eru flestum nýstárlegar. Það sést af góðri aðsókn að foreldrar og börn hafa notið samvistanna.

Brottfararstaður: Kl. 14 fimmtudaginn 23. júlí á einkabílum að Valgeirsstöðum í Norðurfirði.
Viðburður: Fjölskylduferð að Valgeirsstöðum í Norðurfirði
Fararstjórar: Auður Kjartansdóttir og Páll Guðmundsson. Hámarksfjöldi: 30. Þar af 22 í húsi.

Mæting: Kl. 14 fimmtudaginn 23. júlí á einkabílum að Valgeirsstöðum í Norðurfirði.

Undirbúningsfundur var miðvikudaginn 1. júlí kl. 18 í risi FÍ, Mörkinni 6.

Verð: 30.000/35.000. Hálft verð fyrir yngri en 18 ára.

Innifalið: Gisting, sund og fararstjórn.

Bókað á skrifstofu Ferðafélags Íslands, Mörkinni 6 eða í síma: 568 2533.