Hulunni verður svipt af leyndardómum japönsku pappírslistarinnar origami í Borgarbókasafni í Kringlunni laugardaginn 30. apríl.

Jón Víðis mun þar halda ókeypis námskeið í origami.

Á vefsíðu Borgarbókasafnsins segir að origami sé japönsk pappírslist sem hefur notið mikilla vinsælda um allan heim. Origami gengur út á miserfið pappírsbrot sem eru svo endurtekin á ýmsan hátt eftir því hversu viðamikið verkefnið er. Ekkert þarf til nema pappír og skæri og hæfilegan skammt af þolinmæði. Það er stórskemmtilegt að reyna sig við að búa til þrívíðar fígúrur úr pappír.