Ferðafélag barnanna hefur skipulagt skemmtilega ferð í Bláfjöll föstudaginn 19. febrúar.

Planið er að fara í Bláfjöll og gera þar ýmsar tilraunir með snjó. Búa á til snjóhús, bræða snjó og skoða hvað gerist þegar snjóflóð skellur á. Guðfinna Aðalgeirsdóttir, dósent í jöklafræði við Háskóla Íslands, mun fræða ferðalangana um jökla, hvernig þeir hreyfast og ástæðu þess að þeir eru að minnka. Að því loknu verða sett upp höfuðljós og farið í ljósagöngu í myrkrinu.

Bláfjöll: Ókeypis upplifun

Þeir sem vilja í þessa spennandi ferð þurfa að mæta á einkabílum við skrifstofu Ferðafélags í Mörkinni 6 mjög vel klædd með mikið og gott nesti, skóflur, ljós og meira að segja snjóþotur, rassaþotur eða svarta plastpoka til að renna sér á í 3-4 klukkustundir.

Ferðin er hluti af samstarfsverkefni Ferðafélags Íslands og Háskóla Íslands sem heitir: Með fróðleik í fararnesti.

Ferðafélag barnanna býður í ferðina. Ekkert kostar og ekki þarf einu sinni að panta.

Hvað er Ferðafélag barnanna?

Ferðafélag barnanna var stofnað árið 2009 á vegum Ferðafélags Íslands og að fyrirmynd norska ferðafélagsins DNT. Höfuðmarkmið Ferðafélags barnanna er að hvetja börn og foreldra til útiveru og samveru í náttúru landsins og fá þannig öll börn til að upplifa sanna gleði í náttúrunni og upplifa leyndardóma umhverfisins.

Ferðir Ferðafélags barnanna eru farnar á forsendum barna og sniðnar að þörfum þeirra.