Lífið sýning fyrir alla fjölskylduna í Tjarnarbíó. Sýningunni er lýst sem stórskemmtilegu drullumalli á mörkum leikhúss og myndlistar fyrir alla fjölskylduna.

Sýningin vann tvenn Grímuverðlaun á síðasta leikári, „Barnasýning ársins 2015“ og „Sproti ársins 2015“. Fjórar sýningar eru á dagskránni í leikhúsinu og eru þær á fínum tíma.

Tveir krakkar að leika

Leiksýningin fjallar um sköpunarkraftinn, vináttu og hringrás lífsins, þar sem unnið er með mold. Á einu plani er verið að búa til sögu um sköpun heimsins, hvernig landslag breytist í gegnum hamfarir og kraft náttúruafla, hvernig líf kviknar, hvernig fyrstu dýrin skriðu á land og goggunarröðina í náttúrunni – en á öðru plani má lesa úr þessari sömu leiksýningu einfalda sögu af tveimur krökkum að leik. Börnum sem uppgötva skugga sinn og sjálfa sig, finna mold í pokum og fara að drullumalla.

Leikhúsið 10 fingur, sem stendur að sýningunni, setti upp Skrímslið litla systir mín og hlaut fyrir það Grímuverðlaunin sem besta barnasýning ársins 2012.