Bæjarbíó í Hafnarfirði stendur sig frábærlega í því að sýna myndir sem gerðar hafa verið eftir bókum sænska barnabókahöfundarins Astrid Lindgren fyrir alla fjölskylduna á sunnudögum.

Klukkan 15 í dag verður sýnd myndin Lína langsokkur á sjóræningjaslóðum.

Söguþráður myndarinnar fjallar um það í stuttu máli að dag einn  kemur flöskuskeyti frá Suðurhafinu til Línu. Í flöskunni er bréf frá pabba hennar, Langsokk skipstjóra. Hann hefur verið tekinn til fanga af sjóræningjum og biður nú sterku dóttur sína um hjálp. Lína hikar ekki í eina sekúndu. Ásamt Tomma og Önnu leggur hún af stað til Suðurhafsins til að bjarga pabba sínum.En það eru margar hættur á leiðinni og það verður ennþá hættulegra þegar þau koma til staðarins þar sem sjóræningjar ráða ríkjum.

Myndin er með íslensku tali og tekur sýningin 115 mínútur með hlé. Miðinn kostar 500 krónur.