Það verður líf og fjör á Árbæjarsafni í dag en þá hefst viðburðurinn Mjólk í mat og ull í fat. Gestir safnsins geta lært að strokka smjör og gera skyr ásamt því að krakkar fá að sitja hest, sjá konu á baðstofuloftinu í gamla Árbænum spinna, eldsmiða blása í gamlar glæður í eldsmiðjunni og margt fleira. Krakkar geta ekið kassabílum, leikfangasýning er í Árbæjarsafni og messa í kirkjunni klukkan 14.

Viðburðurinn er haldinn árlega og hentar fjölskyldunni.

Heimilisstörfin hafin upp

En af hverju Mjólk í mat og ull í fat?

Sigurlaugur Ingólfsson, verkefnastjóri Árbæjarsafns, svarar því glaður í bragði í samtali við Fréttablaðið: „Þemað er sem sagt Mjólk í mat og ull í fat, sem var svona viðkvæði áður fyrr, að til þess að vera fullgild eiginkona þurftir þú að kunna að koma ull í fat og mjólk í mat og við erum svona að upphefja þennan hluta af heimilisstörfunum.“