Það er gaman að hlusta á fallega tónlist. Söngfjelagið er kór sem hefur síðastliðin fjögur ár haldið tónleika á aðventunni. Sunnudaginn 6. desember kemur Söngfjelagið fram fimmta árið í röð á tvennum tónleikum í Langholtskirkju. Fyrri tónleikarnir eru klukkan 16:00 en hinir klukkan 20:00.

Ókeypis fyrir börn og unglinga

Ókeypis er á tónleika Söngfjelagsins fyrir tónelska 16 ára unglinga og alla yngri. Miðinn kostar 4.500 krónur fyrir þá sem eldri eru og upp úr.

Þema tónleika Söngfjelagsins er að þessu sinni írsk og keltnesk jólatónlist í bland við íslenska tónlist í flutningi Söngfjelagsins og hljómsveitar sem leikur á keltnesk hljóðfæri. Hljóðfæraskipan er með fjölbreytilegra móti; keltnesk harpa og tromma, írskar flautur af ýmsum stærðum og gerðum, fiðla, mandólín, orgel og gítar ásamt þjóðarhljóðfæri Íra, svonefndri uilleann sekkjapípu.

Miðasala er á Tix.is og einnig er hægt að kaupa miða við innganginn. Auk þess er forsala hjá söngfjelögum.