Strandamaðurinn og yfirnáttúrubarnið Dagrún Ósk Jónsdóttir. / MYND Náttúrubarnaskólinn
„Þetta verður notaleg fjölskylduhátíð með töframanni, náttúrujóga, tónlistarsmiðju, gönguferðum. Ég sé um alla skipulagningu og undirbúning hátíðarinnar og er auðvitað með fullt af frábæru fólki í kringum mig til aðstoðar, eins og þau sem sjá um Sauðfjársetrið og marga fleiri,“ segir Dagrún Ósk Jónsdóttir, þjóðfræðingur og yfirnáttúrubarn í Náttúrubarnaskólanum á Ströndum.
Dagrún og Náttúrubarnaskólinn halda Náttúrubarnahátíð á Ströndum helgina 28.-30. júlí. Þar gefst gestum tækifæri til að finna og rækta náttúrubarnið í sér.
Dagrún segir erfitt að geta sér til um hvað margir komi. Mikilvægast sé að þetta verði skemmtileg útihátíð um náttúruna.
Það er líf og fjör í Náttúrubarnaskóla Dagrúnar á Ströndunum.
Mikilvægt að börn læri um náttúruna
Náttúrubarnaskólinn hefur verið starfrækur síðan sumarið 2015 og heldur námskeið fyrir náttúrubörn á öllum aldri. Hann er staðsettur á Sauðfjársetri á Ströndum, rétt sunnan við Hólmavík.
Dagrún segir mikilvægt að öll börn læri að sjá það sem er í kringum þau. Þess vegna hafi hún ákveðið að hafa Náttúrubarnahátíð ásamt því að reka Náttúrubarnaskólann eins og áður í sumar.
Krakkarnir í Náttúrubarnaskólanum finna alltaf eitthvað skemmtilegt við ströndina við Orustutanga. Myndin er fengin af Facebook-síðu Náttúrubarnaskólans.
„Náttúrubarnahátíðin er hátíð fyrir náttúrubörn á öllum aldri. Hún snýst um að sjá hvað allt í kringum okkur er í raun og veru merkilegt, hvernig hægt er að nýta náttúruna á skapandi og skemmtilegan hátt og hvernig má vernda hana um leið. Við vonumst líka til þess að hún auki áhuga á náttúrunni sem er svo mikilvæg.“
Hellingur af tónlist og fjöri
Á hátíðinni verða allskonar skemmtilegar smiðjur, útivist, leikir, sögustundir, tónlist, myndlist, fróðleikur og fjör fyrir alla fjölskylduna.
Á hátíðinni kom fram Svavar Knútur og hljómsveitin Ylja, boðið verður upp á skemmtilegar smiðjur í útieldun og náttúrutónlist, hægt verður að fræðast um jurtalitun og hvernig er unnið úr rekavið. Galdramaðurinn Ingó Geirdal verður með töfrasýningu, auk þess sem það verður stórskemmtilegt Náttúrubarnakviss á föstudeginum og þjóðsögur og ævintýri í sagnahúsi á laugardagskvöldinu. Þá verður hægt að skella sér á hestbak, í náttúrujóga, gönguferðir og sjósund!
Aðgangsmiðinn á hátíðina alla kostar 3.000 krónur. En enginn þarf að vippa svo miklu úr veskinu því hægt er að kaupa miða á staka viðburði og prófa eitthvað skemmtilegt með börnunum.
Ítarlegri upplýsingar er að finna á viðburðasíðu Náttúrbarnahátíðarinnar á Ströndum.
Þú getur lesið meira um Náttúrubarnaskólann á Úllendúllen.
