Nú er þessi tími að nálgast. Þorláksmessan er dagurinn sem misgóður angan læðist út um eldhúsglugga landsmanna og í föt þeirra sem fara á veitingastað til að snæða skötu.
Þau eru mörg sem ekki geta hugsað sér Þorláksmessu án kæstrar skötu. Fái þeir ekki að smakka á þessum undarlega fiski þá hreinlega komast þau ekki í jólaskap.
Ætlið þið að borða skötu?
Margir eru hættir að elda skötu í eldhúsinu heima hjá sér. Það er auðvitað af helberri tillitssemi fyrir nágrönnunum. Þess í stað fara þeir á veitingastað þar sem fá má miskæsta skötu. Sumir gera þetta meira að segja að reglu.
Það getur verið skemmtileg stund hjá fjölskyldunni að fara á einn af þeim veitingastöðum sem bjóða upp á skötu. Það þarf ekki að vera til að fá sér bita heldur aðeins til að finna lyktina. Það getur nefnilega verið afskaplega gaman að fara með börn á veitingastað sem býður upp á skötu og leyfa þeim að finna lyktina, sem er vægast sagt í sérkennilegri kantinum.
En hvers vegna borðar fólk skötu?
Fram kemur á Vísindavefnum að í kaþólskum sið var fasta fyrir jólin og átti þá ekki að borða mikið góðgæti og einna síst á Þorláksmessu. Mikill munur átti að vera á föstumat og jólakræsingunum sem voru handan við hornið. Auk þess þótti ekki vera við hæfi að borða kjöt á dánardegi heilags Þorláks.
Aðalreglan var því að borða lélegt fiskmeti á Þorláksmessu. Misjafnt var þó hvað hentaði hverjum stað. Á Suðurlandi var sumstaðar soðinn horaðasti harðfiskurinn sem til var.
Í kringum jólin var veiddist einkum skata á Vestfjarðamiðum. Hún þótti enginn herramannsmatur ótilhöfð og var því algengur Þorláksmessumatur enda alveg í takt við það sem fyrr sagði, að á Þorláksmessu skyldi borða vondan mat.
Vondur matur verður skárri
Á Vísindavefnum segir svo að eftir því sem tímanum leið tókst Vestfirðingum að tilreiða úr skötunni mikið ljúfmeti eins og skötustöppu, sem þykir nokkuð skárri en sá vondi matur sem var á borðum Vestfirðinga fyrr á öldum.
Og þar hafið þið það. Það er ekki venja að fá sér gott að borða á Þorláksmessu!
Það er góð hugmynd að rifja upp fortíðina og fara með börnin eða barnabörnin á veitingastað sem býður upp á soðna kæsta skötu.
Verði ykkur að góðu.
