Þetta verður nú aldeilis skemmtileg helgi dagana 20. – 21. janúar 2018.
Veðrið í dag er ágætt víða, meira að segja spáð heiðskírum himni og brakandi sól á öllu sunnanverðu landinu, meira að segja á sunnanverðum Vestfjörðum. Ekki viðrar hins vegar vel til útiveru í nágrenni Bolungarvíku og Blönduóss en þar er spáð snjókomu og skýjuðu á austanverðu landinu.
Sunnudagurinn er ekki efnilegur þótt ekki rigni. Allsstaðar verður alskýjað nema í Eyjum. Þar verður rigning. Eina sólarglætan verður á Raufarhöfn. En ætli sé fært þangað?
Kíkið á veðrið! Vefur Veðurstofunnar
Bókasöfnin víða iða af lífi um helgar, sérstaklega á höfuðborgarsvæðinu – þau bjóða upp á fjölda viðburða alla daga. Á sunnudag hefst t.d. í Gerðubergi sýning á myndskreytingum barnabóka undir yfirskriftinni: Þetta vilja börnin sjá. Þar eiga margir landsþekktir teiknarar myndir.
Ef veðrið leikur ykkur grátt og ekki hundi út sigandi þá er alltaf hægt að finna eitthvað skemmtilegt að gera á ullendullen.is
Ævintýri á Kjarvalsstöðum
Á laugardag verður svolítið ævintýralegur viðburður á Kjarvalsstöðum. Þar verður settur upp pop-up Ævintýraleikvöllur fyrir börn og fjölskyldur þeirra. Þið verðið að drífa ykkur. Leikvöllurinn hefur bara verið settur upp tvisvar áður og hann verður aðeins opinn á milli klukkan 13:00 – 16:00.
Boðið verður upp á alls konar spennandi efnivið sem börn fá að leika með og rannsaka á eigin forsendum, svo sem pappakassa, efnisbúta, dalla, plastbox, spítur, potta, pönnur, reipi og teip.
Svo er það sunnudagurinn. Hann er geysilega spennandi. Á Kex Hosteli verður t.d. annar helmingurinn af Skoppu og Skrítlu að kenna krökkum zúmba.
Safnahúsið við Hverfisgötu býður upp á fjölskylduleiðstöfn um safnið þar sem hægt verður að skoða huldufólk og ýmislegt skrýtið.
Fjör í leikhúsi
Svo eru leikhúsin að gera góða hluti. Skúmaskot er nýtt leikrit eftir Sölku Guðmundsdóttur í Borgarleikhúsinu og hefur það fengið góða dóma. Í Þjóðleikhúsinu er nýbyrjað að sýna barnaleikritið Ég get og er hægt að sjá það á laugardag. Sunnudaginn 21. janúar verður svo líka sýning á leikritinu Fjarskalandi, sem er alveg frábært fyrir börn og ungmenni.
Einn hressasti leikhópur landsins síðastliðin ár er Leikhópurinn Lotta. Hópurinn hefur verið að dusta af leikritunum sýnum nú í ársbyrjun og mun sýna leikritið Galdrakarlinn frá Oz nokkrum sinnum fram í mars í Tjarnarbíói.
Góða helgi!
Helgin er í mjög grófum dráttum:
Laugardagur 20. janúar
- Amtsbókasafnið á Akureyri: Tréskúlptúrar Hreins Halldórssonar til sýnis
- Kjarvalsstaðir: Pop-up Ævintýraleikvöllur fyrir alla fjölskylduna
- Amtbókasafnið á Akureyri: Endurvinnsla fyrir hressa krakka
- Leikritið Ég get í Þjóðleikhúsinu
Sunnudagur 14. janúar
- Amtsbókasafnið á Akureyri: Tréskúlptúrar Hreins Halldórssonar til sýnis
- Leikhópurinn Lotta: Galdrakarlinn frá Oz
- Leikritið Blái hnötturinn
- Skrítla kennir krökkum zúmba
- Kynjaverur í fjölskylduleiðsöfn í Safnahúsinu við Hverfisgötu
Hallgrímur og fjölskylda gerðust túristar í vetrarfríinu
Frisbígolf nýtur mikill vinsælda allt árið um kring
Eva María: Fjölskyldunni finnst skemmtilegt að fara í fótabað
