Mannblendin kind slær í gegn í Reykjadal

Reykjadalur

Vinsældir Reykjadals ofan við Hveragerði hafa rokið upp síðastliðin tvö ár. Margar fjölskyldur skreppa í Reykjadal enda ferðin stutt og geta stuttir fætur vel komist leiðina, sem tekur tæpa klukkustund inn frá Hveragerði.

Morgunblaðið hefur fjallað talsvert um Reykjadal upp á síðkastið, bæði um fjölgun ferðamanna á staðnum og þá flottu uppbyggingu sem þar hefur átt sér stað við heitu laugarnar í dalnum.

 

Mannblendin kind slær í gegn

Nýjasta aðdráttaraflið í Reykjadal er líka einkar mannblendin kind, sem er búin að vera við laugina frá því fé var sleppt í sumar. Ferðamenn eru sagðir afar hrifn­ir af kind­inni og þykir vin­sælt að taka „selfie“ með henni.

Blaðið hefur eftir Andrési Úlfars­syni, eig­anda ferðaþjón­ustu­fyr­ir­tæk­is­ins Ice­land Acti­vities, sem fer nánast daglega upp í Reykja­dal að kindin sé orðin ferðamannastjarna. Kindin þessi er ólík öðrum að því leyti að hún forðast ekki fólk heldur elti ferðamenn um svæðið og nýtur þess að láta klappa sér. Andrés telur um gamlan heimalning á ferðinni sem væntanlega tilheyri bónda á svæðinu.

 

Skreppitúr í Reykjadal

Reykjadalur séður af Ölkelduhálsi

Reykjadalur frá Ölkelduhálsi. Þessi leið er fáfarnari en að mörgum talin skemmtilegri gönguleið. Farið með gát og haldið í hendur þeirra yngstu.

Ef þið ætlið að skoða Reykjadal þá er hægt að komast þangað um tvær meginleiðir. Sú sem flestir fara liggur upp frá Hveragerði. Þá er keyrt upp í gegnum bæinn og bílnum síðan lagt á bílastæði þar sem göngustígurinn byrjar. Hann er vel merktur og nær útilokað að villast enda fjölfarið.

Hin leiðin liggur ofan af Ölkelduhálsi. Sú leið er að mörgum talin skemmtilegri gönguleið enda hægt að ganga framhjá bullandi leirhverum. Akvegurinn uppá hálsinum getur reyndar verið svolítið grófur en fær flestum eða öllum bílum á þessum árstíma ef varlega er farið.

Reykjadalur skartar nú haganlegum trépöllum og tröppum við baðaðstöðuna þó ekki sé þar beinlínis nein aðstaða til að skipta um föt. Skiptar skoðanir hafa verið um uppbygginguna en víst er að pallarnir vernda umhverfið að einhverju leyti og minnka líkurnar á að maður fljúgi á hausinn í drullu eða röku eða frosnu grasi. Á sumrin getur fjöldi útlendra ferðamanna á svæðinu verið mikill en minnkar núna eftir því sem líður á haustið.

Fyrir þá sem sækjast eftir ævintýrum getur jafnvel verið spennandi að heimsækja staðinn að kvöldi til eftir að myrkur hefur skollið á . En þá er vissara að taka með sér vasaljós og halda hópinn svo enginn villist.

 

Ætlið þið í ferðalag? Þið getið lesið meira um Reykjadal á Úllendúllen.

Deilið þessu:

Skildu eftir svar

Vinsamlegast láttu rétt nafn og netfang fylgja með athugasemd