Pokahlaup og meira fjör á Árbæjarsafni

Um verslunarmannahelgina verður venju samkvæmt blásið til fjölbreyttrar leikjadagskrár á Árbæjarsafni. Dagskráin er ætluð krökkum, en hún er að sjálfsögðu opin öllum þeim sem ætla að njóta þess sem Reykjavík hefur upp á að bjóða, þessa mestu ferðahelgi ársins.

Bæði sunnudag og mánudag 2.-3. ágúst geta gestir til að mynda keppt í pokahlaupi, stultugangi og reiptogi milli kl. 13-16.

Á safninu er fjölbreytt úrval af útileikföngum sem krökkum býðst að nota að vild, svo sem húla-hringir, snú-snú, kubb og stultur. Á gamaldags róluvelli eru rólur, vegasalt og sandkassi með leikföngum.

Mælt er með því að yngsta kynslóðin heimsæki sýninguna „Komdu að leika“ í safnhúsi sem kallast Landakot en þar er mikill fjöldi leikfanga frá ýmsum tímum sem krökkum er frjálst að leika sér með.

Á sunnudeginum 2. ágúst kl. 11 verður messa í litlu fallegu safnkirkju Árbæjarsafns. Sr. Petrína Mjöll Jóhannesdóttir frá Árbæjarkirkju þjónar fyrir altari og prédikar og Krisztina Kalló Szklenár spilar á orgel.  Félagar úr kór Árbæjarkirkju leiða söng.

Í Árbæ má kynnast sveitalífi fyrri alda og í haga er að finna hesta, folald, kindur og lömb.

Í Dillonshúsi verða að sjálfsögðu ljúffengar veitingar í boði alla helgina.

Afgreiðsla og verð

Árbæjarsafn er opið daglega í sumar frá kl. 10:00 – 17:00.

Aðgangseyrir fullorðnir – 1.740 kr.

Börn 0-17 ára – ókeypis aðgangur

Öryrkjar og ICOM korthafar – ókeypis aðgangur

Námsmenn með gilt skólaskírteini – 1.120 kr.

Deilið þessu:

Skildu eftir svar

Vinsamlegast láttu rétt nafn og netfang fylgja með athugasemd