Dagrún Ósk: Allir spenntir fyrir Náttúrubarnahátíð á Ströndum

„Það gengur alveg ljómandi vel. Náttúrubarnaskólinn vex bara og dafnar með hverju árinu sem er ótrúlega skemmtilegt. Undirbúningurinn fyrir Náttúrubarnahátíðina á Ströndum gengur líka mjög vel. Þetta er allt að smella saman og við erum mjög spennt,“ segir Dagrún Óska Jónsdóttir, þjóðfræðingur hefur starfsheitið yfirnáttúrubarn og sér um skipulagningu hátíðarinnar.

Náttúrubarnahátíðin verður haldin á Ströndum helgina 13. – 15. júlí.

Náttúrubarnahátíðin var haldin í fyrsta skipti í fyrrasumar og er þessi óvenjulega útihátíð endurtekin í ár.

Náttúrubarnaskólinn er starfræktur innan vébanda Sauðfjársetursins í Sævangi rétt sunnan við Hólmavík, og þar verður hátíðin haldin.

Strandamaðurinn og yfirnáttúrubarnið Dagrún Ósk Jónsdóttir. / MYND Náttúrubarnaskólinn

Finndu þitt innra náttúrubarn

Á hátíðinni fá allir gestir, bæði börn og fullorðnir, kjörið tækifæri til að finna eða rækta sitt innra náttúrubarn.

„Helsta markmið hátíðarinnar er að auka þekkingu á náttúrunni og sýna hvað allir hlutir í kringum okkur eru í raun og veru merkilegir. Einnig hvernig má nýta náttúruna á skapandi á skemmtilegan hátt en jafnframt hvernig á að vernda hana, og svo auðvitað að skemmta sér saman, börn og fullorðnir,“ segir Dagrún.

Hátíðin hefst föstudaginn 13. júlí með gönguferð og síðan setningarathöfn og mögnuðum veðurgaldri.

„Mér sýnist ekki veita af að kenna fólki veðurgaldurinn. Hann hefur reynst okkur mjög vel í Náttúrubarnaskólanum og þegar fólk hefur lært hann er ekkert mál að framkvæma hann heima hjá sér þegar á þarf að halda,“ bætir Dagrún við.

Hundur í óskilum, Latibær og náttúrbarnakviss

Um helgina verða svo margir fjölbreyttir viðburðir sem flétta saman skemmtun og fróðleik. Tvíeykið í Hundur í óskilum verða með tónleika á laugardagskvöldinu, góðir gestir koma í heimsókn úr Latabæ á sunnudeginum og svo verður náttúrubarnakviss og vöffluhlaðborð á föstudeginum. Einnig verða smiðjur um fugla, veðrið og útieldun, hægt að fara í fjallgöngur, gönguferðir, á hestbak og í náttúrujóga. Það verða drauga- og tröllasögur í Sagnahúsinu, brúðuleikhúsið Handbendi, víkingafélagið Víðförull kemur í heimsókn og margt fleira.

„Ég hvet sem flesta til að kynna sér dagskrána og koma og njóta með okkur. Ég held að þegar fólk læri að þekkja náttúruna, aukist ósjálfrátt sú virðing sem það ber fyrir henni. Náttúran er svo mikilvæg“ segir Dagrún að lokum en hægt er að kynna sér hátíðina á Facebook síðu Náttúrubarnaskólans, á natturubarnaskoli@gmail.com eða hjá Dagrúnu í síma 661-2213.

Dagskrána í heild sinni má nálgast á: https://www.facebook.com/events/2031198743574675/

Aðgangseyrir að hátíðinni í heild verður 3000 kr. en hægt er að kaupa sig inn á staka daga fyrir 1.500 krónur. Frítt verður fyrir hátíðargesti að tjalda á Ferðaþjónustunni Kirkjuból sem er beint á móti Sauðfjársetrinu.

 

Þetta er Náttúrubarnaskólinn

Það er Náttúrubarnaskólinn sem stendur fyrir hátíðinni en hann hefur verið starfræktur frá sumrinum 2015. Náttúrubarnaskólinn stendur fyrir fjölbreyttum námskeiðum yfir sumartímann fyrir náttúrubörn á öllum aldri þar sem þau læra um náttúruna með því að sjá, snerta og upplifa.

Dagrún segir dagskrá Náttúrubarnaskólans með svipuðu sniði og áður. Námskeiðin eru með ólíkum þemum eru alla fimmtudaga (nema næsta fimmtudag reyndar vegna hátíðarinnar) og svo eitt mjög skemmtilegt helgarnámskeið í mánuði.

„Fyrst voru náttúrulega mest krakkar af svæðinu en núna koma líka alltaf fleiri og fleiri annarsstaðar að,“ segir Dagrún.

 

Meira um Náttúrubarnaskólann á Ströndum

 

Loading
Center map
Traffic
Bicycling
Transit

Deilið þessu:

Skildu eftir svar

Vinsamlegast láttu rétt nafn og netfang fylgja með athugasemd